Matthew 2
Mötkutukutu azi wehön kotkotŋeyök kaget.
1Jisösnöŋ kiŋ kembu Herodkö nalöŋe Judia prowinsgö taon qetŋi Betlehem asuhuyök. Asuhuyöhi, nalö miaŋgöreŋ seŋgelaugö mötmöt azi wehön kotkotŋeyök Jerusalem sitinöŋ kaget. 2Kaba kewö qesiget, “Juda eŋgöreŋ kiŋ kembu akŋawi, morö mi asuhuba denike ahöza? Nini wehön kotkotŋe mala yaŋgöreŋ undi asuhui eka könaŋi mewö möta waikŋi memba möpöseibingöra kazin.”3Mewö qesigetka kiŋ kembu Herod aka Jerusalem könagesö yambuk malgeri, yeŋön körek pakpak keu mi möta auruget. 4Aurugetka kiŋ Herodnöŋ keu ala könagesögö jike nup galöm bohonŋi aka Köna keugö böhi pakpak köl öröm eŋgii kaget. Kaba tokogetka kewö qesim eŋgiyök, “Amötqeqe Toŋi Kraistnöŋ mönö denike asuhumapköra jigetka ahöza?”
5Qesim eŋgiiga kewö meleŋ waŋgiget, “Yaŋön mönö Judia prowinsgö taon qetŋi Betlehem miaŋgöreŋ asuhuma. Miaŋgö keuŋi mi kezapqetok azi Maikanöŋ kewö ohoi ahöza,
6‘O Betlehem könagesö Juda gölmenöŋ maljei, eŋgö sutŋineyök kembu ketaŋi asuhuba nani Israel könagesö mindiŋgöba köyan köl neŋgima. Miaŋgöra iŋini Juda gölmegö jitŋememe yeŋgö sutŋine malgetka qetbuŋaŋinan eretŋi qahöpmahöp akza.’”
7Mewö meleŋ waŋgigetka mötkutukutu azi mi ölöŋ eŋgoholi kagetka kewö qesim eŋgiyök, “Undiŋi mönö wani nalönöŋ asuhui könahiba eket?” Miaŋgö könaŋi törörök mötmamgö möta mewö qesim eŋgiyök. 8Miaŋgö keuŋi möta melaiba kewö jim kutum eŋgiyök, “Iŋini mönö Betlehem anda morö mi törörök qesiba miwikŋaiba miaŋgöreŋök buzup keu algetka nöŋgöreŋ kama. Nöŋön mi möta mewöŋanök anda i waikŋi memba möpöseim waŋgimam.”
9Kiŋnöŋ mewö muneŋ jiba jim kutum eŋgiiga möta könanöŋ anget. Anda undi wehön kotkotŋe mala ekeri, miaŋön nöröpŋine mutukmutuk ani mötötei-get Betlehem anda miri morö nahön ahöyöhi, mönö miaŋgöreŋ kinök. 10Undi mi kini eka sösöŋgai keta bölökŋi aket. 11Sösöŋgai aka miri uruŋe öŋgöba morö aka namŋi Maria etkeket. I etkeka simin köla sipköba waikŋi memba möpöseim waŋgiget. Möpöseim waŋgiba bayaŋgösöŋini qeaŋda miaŋgöreŋök goul, jiniŋ paura aka sanda qetŋi mör mi uzeta kalem waŋgiget.
12Suŋgem kun ahöget-ka Anutunöŋ gaun kondela kiŋ Herodköreŋ kunbuk anbepukö qetal eŋgiyök. Miaŋgöra köna kungenök nanŋini miri gölmeŋine liliŋgöba anget. Mewö. a
Herodköra asamböta Josef anöm-moröŋi Ijipt anget.
13Mötkutukutu azi mieŋön angetka Josefnöŋ gaun ehiga Kembugöreŋ garata kunŋan asuhum waŋgiba kewö jii mörök, “Herodnöŋ morö qei kömumapkö jarum waŋgima. Miaŋgöra mönö wahöta morö aka namŋi etkuaŋgita ölöŋ köla Ijipt kantrinöŋ anme. Miaŋgöreŋ anda malgetka biaŋ nanak kamegö nalö jimami, miaŋgöreŋ mönö liliŋgöba kame.”14Mewö jii möta wahöta suŋgem miaŋgöreŋök morö nahön aka namŋi etkuaŋgita Ijipt anget. 15Ijipt anda malgetka kiŋ Herodnöŋ kömuiga nalö miaŋgöreŋök liliŋgöba kaget. Mutuk Kembunöŋ kezapqetok azi Hosea sölölöhöiga keu kewö jii ahöza, “Nöŋön nahöni oholbiga Ijipt gölme mosöta kayök.” Kezapqetok keu miaŋön mönö mewö asuhuiga ölŋambuk ahök. Mewö. b
Morö azi Betlehem gölmenöŋ eŋguget kömuget.
16Mötkutukutu azi mieŋön Juda gölme ölöŋ mosöta angetka Herodnöŋ miaŋgö könaŋi eka “Tilipköm niŋgiget,” jiba irimŋi gwötpuk seholiiga jimkutukutu kewö alök, “Yarö azi, iŋini Betlehem aka gölme pakpak mi liliköba ahözawi, mönö miaŋgöreŋ anda azi morö (yara) yambuŋini yahöt aka miaŋgö bapŋe akzei, mi körek eŋguget kömume.” Mötkutukutu azi undi asuhuyöhaŋgö nalögöra törörök qesim eŋgiiga jiget möröhi, miaŋgö dop morö azi yambuŋinaŋgöra jimkutukutu mi alök.17Kezapqetok azi Jeremaianöŋ keu kun jii ahözawi, miaŋön mönö mewö asuhuiga ölŋambuk ahök. Keu mi kewö,
18“Silat mi Betlehem kösutŋeyök miri qetŋi Rama miaŋgöreŋök mötketka sahöt gigilahöze. Reizöl ambigö gwölönarökurup yeŋön moröurupŋini qahöwaketka urureŋ meze. Miaŋgöra sahötketka urukölalep mem eŋgibingö aketka urukondumök mörakze.” Mewö. c
Ijipt mosöta Josef anöm-moröŋi Nazaret liliŋgöget.
19Josefnöŋ Ijipt maliga kiŋ Herodnöŋ kömuiga miaŋgöreŋök Kembugöreŋ garata kunŋan gaunöŋ asuhum waŋgiba 20kewö jiyök, “Morö qeget kömumapkö mönögeri, yeŋön lök kömuget. Miaŋgöra mönö wahöta morö aka namŋi etkuaŋgita liliŋgöba Israel gölmenöŋ anme.” 21Mewö jiiga Josefnöŋ wahöta morö aka namŋi etkuaŋgita liliŋgöba Israel gölmenöŋ anget.22Könanöŋ anda keu kewö mörök, “Herodkö nahönŋi Arkelausnöŋ iwiŋaŋgö salupŋe Judia prowins galöm köla malja.” Mewö möta miaŋgöreŋ anmamgö keŋgötŋi mörök. Möta mali Anutunöŋ gaunöŋ Galili prowinsnöŋ anmegö jim kutum waŋgiiga wahöta miaŋgöreŋ anget. 23Galili prowinsnöŋ aŋgota taon qetŋi Nazaret miaŋgöreŋ malget. Mewö malgetka kezapqetok azi yeŋön Amötqeqe Toŋaŋgöra keu jigeri, miaŋön ölŋambuk ahök. Keu mi kewö, “Yaŋgö qetŋi mi Nazaret azi qeta malme.” Mewö. d
Copyright information for
BMU